Говьсүмбэр аймгийн иргэдийн Төлөөлөгчдийн Хурлын 2022 оны 09 дүгээр сарын 30-ний өдрийн 03 дугаар тогтоолоор Говьсүмбэр аймгийн нэгдсэн эмнэлгийг төр нийгмийн зүтгэлтэн, “Алтан гадас” одонт, АИХ-ын депутат, Говьсүмбэр аймгийн хүндэт иргэн Шаравын Насанбуянгийн нэрэмжит болгох тухай, мөн өдрийн 04 дүгээр тогтоолоор Мэс засал, гэмтлийн тасгийг Хөдөлмөрийн гавьяаны улаан тугийн одонт, тэргүүлэх зэргийн эмч Мамбуугийн Эрдэнэбилэг агсаны нэрэмжит болгох тухай тогтоолууд батлагдсан билээ.Уг тогтоолуудын дагуу нэрэмжит болгох үйл ажиллагааны нээлтийг 2022.11.24 өдөр нэгдсэн эмнэлгийн хурлын танхимд зохион байгуулж, аймгийн ИТХ-ын дарга Ш.Билэггүмбэрэл Нэгдсэн эмнэлгийн удирдлага, салбарын албан хаагч, гэр бүлийнхэнд тогтоолыг гардуулан өгч, нээлтийн тууз хайчлах ёслолыг зохион байгуулж, Ш.Насанбуян дарга болон М.Эрдэнэбилэг эмчийн үр хүүхэд төрөл төрөгсөд, найз нөхөд, хамтран ажиллагсад үг хэлж дурсамжаа хуваалцаж, эмнэлгийн эмч ажилчид уран бүтээлээ танилцуулсан сайхан дурсамжтай, дотор огшуулж нулимс түрсэн, бидний бахархалын өдөр байлаа.Энэхүү нээлтийн үйл ажиллагааг зохион байгуулахад оролцсон АИТХ-ын дарга Ш.Билэггүмбэрэл, АИТХ төлөөлөгчид, Аймгийн Засаг дарга болон Засаг даргын тамгын газрын хамт олон, Ц.Мөнх-Од даргатай ЭМГ-ын хамт олон, Цэнджав даргатай Дуу бүжгийн Боржигин чуулгын хамт олон, аймгийн Соёлын газар, Боржигон өв музей, Ш.Насанбуян дарга болон М.Эрдэнэбилэг эмчийн үр хүүхэд төрөл төрөгсөд, найз нөхөд та бүхэнд маш их баярласнаа илэрхийлж амьдралд нь аз жаргал сайн сайхан бүхнийг хүсэн ерөөе.Сайн бүхэн дэлгэрэх болтугай.

Мөн энэ өдөр Эзэн богд Чингис хааны мэндэлсний 860 жилийн ой, “Монгол бахархлын өдөр”-т зориулж Их эзэн Чингис хааны эш хөргийг нэгдсэн эмнэлэгт залж байрлууллаа.